Túrkistanda babalar rýhyna 100 Quran hatym duǵasy jasaldy (FOTO+VIDEO)
Búgin kıeli Túrkistan qalasyndaǵy Qoja Ahmet Iasaýı kesenesinde babalar rýhyna 100 Quran hatym duǵasy jasaldy.
Igi is-sharaǵa Bas múftı Naýryzbaı qajy Taǵanuly, Túrkistan oblysynyń ákimi Ómirzaq Shókeev, elimizge tanymal qarılar, oblys bas ımamdary men ár aımaqtan kelgen jas qarılar qatysty.
«Búgingi izgi bastamaǵa uıytqy bolǵan Qazaqstan musylmandary dinı basqarmasyna alǵysymdy bildiremin. Kıeli Túrkistandy túletý – barshamyzdyń ortaq isimiz» dep atap ótti Ómirzaq Estaıuly.
Tarıhı is-sharada Bas múftı Naýryzbaı qajy Taǵanuly: «Biz ata-babasyn ardaqtaǵan, áýlıe-ámbıesine laıyqty qurmet kórsetken halyqpyz. Respýblıkalyq Quran baıqaýy qarsańynda qarılarymyz júz ret Qurandy tolyq hatym etti. Búgin osy oqyǵan qasıetti Quran aıatyn babalar rýhyna baǵyshtap otyrmyz. Hadıs-sharıfte: «Rasynda Alla Taǵala (izgi urpaqtyń duǵasymen) pendeniń dárejesin kóteredi. Sonda pende: «Bul neniń sebebinen?» dep suraıdy. Alla Taǵala: «Seniń urpaqtaryńnyń duǵasy sebepti» dep jaýap beredi» delingen. Bizdiń jasaǵan duǵamyzdyń sebebinen babalarymyzdyń rýhy peıishte shalqyǵaı dep úmittenemiz. Elimiz aman, jurtymyz tynysh bolǵaı» dedi.
Bas múftı bastaǵan din qyzmetkerleri men qarılar elimizdiń ıgiligi men bolashaǵy úshin qurban bolǵan batyrlarymyz ben han-sultandarymyzdyń, talaı náýbetti zamandarda repressııaǵa ushyraǵan ata-babalarymyzdyń rýhyna qasıetti Quran aıattaryn baǵyshtap, jarylqaý tiledi. Sonymen qatar táýelsiz elimizdiń erteńi men halqymyzdyń birligi men amandyǵy úshin duǵa jasady.
Aıta ketsek, erteń Túrkistan shaharynda Quran Kárimdi jatqa jáne mánerlep oqýdan H respýblıkalyq baıqaý bastalady.
