Túrkistanda H respýblıkalyq qarılar baıqaýy bastaldy (FOTO)
Túrkistan qalasyndaǵy «Kongress Holl» mádenıet kesheninde Qazaqstan musylmandary dinı basqarmasynyń uıymdastyrýymen Quran Kárimdi jatqa jáne mánerlep oqýdan H respýblıkalyq baıqaý bastaldy.
74 úmitker qatysyp jatqan baıqaýdyń ashylý rásimine QMDB Tóraǵasy, Bas múftı Naýryzbaı qajy Taǵanuly arnaıy qatysyp, qarılarǵa sáttilik tiledi. Qasıetti Quran Kárim oqylyp, Bas múftı duǵa jasady.
«Barshańyzǵa Allanyń amandyǵy men bereketin tileımin. Rabbymyz búgingi ıgi sharamyzdyń sátti ótýin násip etsin. Ámın!
Birde sahabalar Aısha anamyzdan (Alla oǵan razy bolsyn) ardaqty Paıǵambarymyzdyń minezi jaıly suraǵanda ol: «Alla elshisiniń minezi tup-týra Quran edi» dep jaýap bergen eken. Demek qarılardyń minezi Paıǵambarymyz sekildi kórkem bolýy qajet.
Qurmetti qarılar! Bıyl onynshy márte ótip otyrǵan baıqaýdyń maqsaty – jattaǵan Qurandaryńyzdy esterińizge qaıta túsirý jáne Allanyń qasıetti kitabyn el arasynda keńinen nasıhattaý. Bul jarys bolǵannan keıin júldeli oryn bárine teń buıyra bermeıdi. Degenmen ýaıymdamańyzdar, qobaljymańyzdar. Aımaqtyq irikteýden ótip, osy baıqaýǵa qatysýlaryńyzdyń ózi úlken jetistik. Al jarysty uıymdastyrýǵa úles qosqan jomart azamattar men basy-qasynda júrgen barsha din qyzmetkerine, ımamdarymyzǵa aıryqsha alǵysymdy bildiremin» dedi Bas múftı.
Dál qazir «Quran Kárimdi jatqa jáne mánerlep oqý» baıqaýynyń 10 parany oqýdan alǵashqy kezeń bastaldy. Al qatysýshylardy elimizge belgili qarılar Sádýaqas Oljabaı (tóraǵa), Kámiljan Iýldashev, Danııar Jumabaev, Ersin Ámire jáne Jumanazar Sadyrhanov baǵalaýda. Sondaı-aq búgin qatysýshylar 20 parany jatqa oqý jáne mánerlep oqý boıynsha, al erteń 30 parany jatqa oqý boıynsha baq synaıdy.
Aıta keteıik, eki kúnge sozylatyn qarılar baıqaýy el Táýelsizdiginiń 30 jyldyǵyna oraı uıymdastyryldy. Eldegi pandemııaǵa baılanysty baıqaýdyń «Munara TV» telearnasynan, «Mýftııat QMDB» YouTube-arnasy men múftııattyń Instagram-daǵy @muftiyatkz resmı paraqshasynan onlaın kórsetilimi ótip jatyr.
