Ýnıversıtet janynan «NM Collection» sheberhanasy ashyldy (FOTO)
Nur-Múbarak ýnıversıtetinde kópten kútken súıinshi jańalyqtyń tusaýy kesildi. Ýnıversıtet janynan stýdent qyz-kelinshekterdi sheberlikke, tiginge baýlıtyn kásibı jabdyqtalǵan «NM collection» sheberhanasy ashyldy.
– Qulshylyq áýretti jabýdan bastalady. Al tiginshilikpen aınalysý – ýájip. Sondyqtan bıyl oqý ornymyzdyń 20 jyldyǵyna oraı ýnıversıtettiń Tárbıe jáne áleýmettik damý departamenti, bas maman Gúlvıra Zaýrbekova ustaz uıytqy bolyp, tusaýy kesilip jatqan tigin tsehy qyz balalardyń bolashaǵyna úlken úles qosatyn sheberhana bolady dep senemiz. Bizdiń bilim alýshy qyz-kelinshekterimiz tek bilim alýmen shektelmeı, on saýsaǵynan óneri tamǵan sheber bolsa degen nıetimiz bar edi. Sol maqsatty iske asyrýǵa qoldaý kórsetken belsendi qazaq qyzdaryna alǵys aıtamyn, – dedi prorektor, dotsent Qaırat Qurmanbaev alǵysóz barysynda.
Al sheberhanaǵa shashý shasha kelgen Bilim berý isiniń úzdigi, «Altyn arqaý» mádenı-Etnografııalyq qoǵamdyq birlestiginiń tóraıymy, qazaq kımesheginiń nasıhatshysy Ǵalııa Qaıdaýylqyzy sheksiz rızalyǵyn bildirdi.
– Ańsaǵan armandaǵan nársege qolymyz jetkende baǵalaı almaı jatamyz. Ózi bola qalǵandaı, burynnan qazyp qoıǵan qazyna, kómip qoıǵan kómbeni ashyp ala salǵan sııaqty bolyp, onyń artyndaǵy úlken eńbektiń bary anyq. Aqıqatynda, qazaqtyń keń peıili, taza kóńili úshin de bolar, Alla Taǵala dinimizben qaýyshtyryp, osyndaı Nur-Múbarak ýnıversıtetiniń elimizde bolýy úlken nyǵmet. Sheberhana qyzdarymyzdyń sheber, ónerli bolýyna bastaıtyn berekeli shańyraq bolsyn! – dep batasyn jaýdyrdy.
Ýnıversıtet basshylyǵy tigin sheberhanasynyń ashylýyna atsalysqan aıaýly jandarǵa alǵys hat berip, syıkáde jasady. Qadirli qonaqtar atynan sóz sóılegen belgili psıholog Balqııa Baltabaı osyndaı qaıyrymdy iske jumyla kirisken jandarǵa alǵys bildirip, jańa sheberhanaǵa sáttilik tiledi.
Qazaqtyń kúmbir kúıi áýelegen appaq tigin sheberhananyń tizginin qolǵa alǵan sheber tiginshi Sandýǵash Joldýbaeva alǵashqy tapsyrystardy da qabyldap úlgerdi.
