Úshinshi kúnniń nátıjesi: RANT músheleri 1862 adamdy qamtyǵan 26 is-sharaǵa qatysty (FOTO)
QMDB Tóraǵasy, Bas múftı Naýryzbaı qajy Taǵanuly bastaǵan jumys toby Atyraý oblysyna jasaǵan sapardyń úshinshi kúni 1862 adamdy qamtyǵan 26 is-sharaǵa qatysty.
Aldymen Bas múftı Atyraý qalasynyń irgesinde ornalasqan Bereke aýylynda «El úlesi – páterge» qaıyrymdylyq aktsııasy aıasynda 453, 454 jáne 455-baspana kiltin din salasynyń jas ustazdary men ımamdaryna tabys etti.
Budan keıin oblys ortalyǵynan shalǵaıda ornalasqan Qurmanǵazy aýdanyna arnaıy baryp, Mádenıet úıinde ólke turǵyndarymen, al «Temiráli» meshitinde jamaǵatpen júzdesti. Sondaı-aq Naýryzbaı qajy Taǵanuly destrýktıvti dinı aǵymda bolǵan azamatpen núkteli kezdesý ótkizip, jeke túsindirý jumysyn júrgizdi. Odan keıin oblystyq «Atyraý» telearnasyna suhbat berdi.
Sonymen qatar QMDB bólim meńgerýshileri men RANT músheleri Atyraý óńiriniń oblystyq, qalalyq jáne aýdandyq meshitterinde ýaǵyz-nasıhat jumystaryn júrgizdi. Máselen QMDB Ýaǵyz-nasıhat bóliminiń meńgerýshisi Batyrjan Mansurov «Sultan Beıbarys» meshitinde «Týra jolda berik bolý» taqyrybynda 50 adamǵa ýaǵyz aıtsa, Dinı ońaltý bóliminiń meńgerýshisi Qanat Alshynbaevtyń «Istıǵfar» aıtý» taqyrybynda «Quspan molla» qalalyq meshitinde ótken ýaǵyz-nasıhatyna 200 adam qatysty.
RANT múshesi Hamzat Ádilbekov Qyzylqoǵa aýdanynyń Saǵyz aýylynda jergilikti jamaǵatpen júzdesip, otbasy taqyrybynda ýaǵyz aıtty. Odan bólek aýdandyq «Báıterek» meshitinde 50 adamǵa dinge qyzmet etýdiń túrlerin baıandap berdi.
Kópke tanymal ustaz, RANT múshesi Arman Qýanyshbaev oblystyq «Imanǵalı» meshitinde «Fıqh iliminiń ádistemesi» taqyrybynda dáris ótkizse, jastarmen arnaıy kezdesip, jat aǵymnyń zııany jóninde ýaǵyz aıtyp, suraqtarǵa jaýap berdi. Ol «Át-taqýa» meshitinde «Otbasyndaǵy qulshylyq» taqyrybynda ýaǵyz aıtsa, «Musylmannyń ózge din ókilimen qarym-qatynasy» taqyrybynda «Munara TV» arnasyna suhbat berdi.
Jumys toby quramyndaǵy ustaz Rızabek Battaluly Qurmanǵazy aýdanynyń jamaǵatyna, RANT múshesi Ǵazız Ahmet Atyraý oblystyq «Imanǵalı» jáne Inder aýdandyq «Áıip qajy» meshitinde ýaǵyz aıtty. Al Ulan Sharıpov Atyraý qalalyq jumyspen qamtý ortalyǵy mamandaryna jat aǵymnyń belgilerin aıtsa, Mahambet aýdandyq «Mahambet-Isataı» meshitinde jamaǵatqa «Allanyń nyǵmetteri» taqyrybynda ýaǵyz júrgizdi.
Atyraý oblystyq Ádilet basqarmasynda Amantaı Sadıev teris aǵymdardan saqtaný joldaryn baıandasa, jergilikti «Dına» bazarynda ornalasqan namazhanada saýdagerlerge arnaıy «Imam Muhammedtiń saýdadaǵy úkimderi» taqyrybynda ýaǵyz aıtty. Sonymen qatar «Qajymuqan Muńaıtpasov» meshitinde «Qoǵamǵa zııanyn tıgizbeý – momyndardyń belgisi» taqyrybynda 250 adamǵa nasıhatyn jetkizdi.
