Úshtóbe eldimekenindegi medrese qurylysy aıaqtalýǵa jaqyn (FOTO)
QMDB Tóraǵasy, Bas múftı Naýryzbaı qajy Taǵanuly Qaraǵandy oblysy Buqar jyraý aýdany Úshtóbe eldimekeninde salynyp jatqan medreseniń qurylys jumysymen tanysty.
Qazirgi ýaqytta munda 3 qabatty jańa keshenniń qurylysy qarqyndy júrýde. Jaýapty ımam Jandos Nyǵmannyń sózinshe, nysan bıyl paıdalanýǵa berilýi tıis. Munda shákirtter úshin jataqhana, oqý zaly, sport zal, ashana bolady. Negizinen 100 balaǵa laıyqtalǵan jańa keshen sońǵy standarttarǵa saı salynady.
Jańa oqý ortalyǵynyń qurylysymen tolyq tanysqan soń Bas múftı: «Dinı basqarmanyń taǵy bir mindeti – úzdik oqyǵan balalarǵa tegin bilim berýdi jalǵastyrý, olardyń dinı bilim alýyna, ózge de pánderdi qatar oqýyna jaǵdaı jasaý», – dedi. QMDB Tóraǵasy qazirgi tańda múftııattyń elimiz boıynsha 20-dan astam shákirttiń oqý aqysyn tólep, olarǵa qamqorlyq jasap kele jatqanyn jetkizdi.
