Ustazdarǵa aıryqsha alǵys bildiremin
Qurmetti ustazdar men shákirtter!
Osymen oqý jyly da óz máresine jetti. Jyl boıy tabandylyq tanytyp, shákirtterge yqylaspen bilim bergen ustazdarǵa aıryqsha alǵysymdy jetkizemin. Ilim izdep, bilimdi bolýǵa talpynǵan shákirtterge de rııasyz nıetpen rızashylyǵymdy bildiremin.
Rasynda, qaı kezeńde, qaı qoǵamda bolsyn, óz dinin, tilin, tarıhyn, mádenıeti men ádebıetin bilgen, sonymen qatar shet tilderin meńgergen, oılaý deńgeıi joǵary tulǵalar qashan da kóshbasshy bolǵan. Olar qoǵamnyń úlgi alar tulǵasyna aınalǵan.
Qasıetti kitabymyz Quranda: «Alla senderdiń aralaryńnan ıman keltirgender men bilim ıelerin joǵary dárejelerge kóteredi» («Mújádálá» súresi, 11-aıat) delingen. Alla Taǵala bilim men hıkmet ilimin úırengen pendesiniń dárejesin osylaısha arttyryp qoıady.
Biz ımamdar forýmynda qabyldanǵan «Búgingi musylmannyń kelbeti» qujatynda, «Jeti rýhanı qazyq» Tuǵyrnamasynda bilim alýdyń mańyzyn aıryqsha atap óttik. Jeti rýhanı qazyqtyń bir ustyny retinde bilim alýdy bekittik.
HHI ǵasyrdyń musylman qaýymy bilimmen qatar danalyq ilimin boıyna sińirip, qoǵamdy izgilik pen birlikke bastaýshy tulǵalarǵa aınalýy tıis. Paıǵambarymyz Muhammed (oǵan Allanyń salaýaty men sálemi bolsyn) bir hadısinde: «Bilim men hıkmet musylmandardyń joǵaltqan qazynasy, qaı jerden tapsa da ıemdenip alsyn», – degen.
Áıgili ǵulama Ábý Hamıd Muhammed ıbn Muhammed ál-Ǵazalı: «Paıdaly bilimmen shuǵyldaný – búkil basqa isterge qaraǵanda áldeqaıda jaqsy...» – degen eken. Jyl boıy bilim jolyndaǵy amaldaryńyzǵa Alla mol saýaptan jazǵaı.
Qudaıǵa shúkir, búginde dinı salada bilim alýǵa barlyq múmkindik qarastyrylǵan. Medreselerimiz kolledj mártebesin aldy. Nur-Múbarak ýnıversıtetinde doktorantýra bólimi ashyldy. Memleketimiz jyl saıyn 200-ge jýyq bilim grantyn bólýde.
Alla Taǵala barshamyzǵa paıdaly bilim alyp, elimiz ben dinimizge qyzmet ete berýdi násip etkeı! Ámın!
Naýryzbaı qajy TAǴANULY,
Qazaqstan musylmandary dinı basqarmasynyń tóraǵasy, Bas múftı
