«Ýzstandart» agenttigi mamandarymen kezdesti (FOTO)
Ózbekstanda arnaıy issaparda júrgen «Halal Damý» dırektory Aıbek Asqarbekuly «Ýzstandart» standarttaý, sertıfıkattaý jáne tehnıkalyq retteý ǵylymı-zertteý ınstıtýtynyń sertıfıkattaý agenttigi («Ýzstandart» agenttigi) meńgerýshisi Saıdov Sýnnatıllamen kezdesti.
Jıynǵa «Halal Damýdyń» bas tehnology Aıjan Omarova jáne Ózbekstandaǵy tehnıkalyq retteý, standarttaý, metrologııa jáne sertıfıkattaý salasyndaǵy máselelerdi sheshýge arnaıy ýákilettik berilgen memlekettik organ – «Ýzstandart» agenttiginiń mamandary qatysty.
Basqosýda eki eldiń standarttaý jáne sertıfıkattaý salasynda atqarylyp jatqan jumystary boıynsha aqparat berilip, kásibı biliktilikti jetildirý maqsatynda tájirıbe almasty. Ortalyq Azııa elderinde halal ındýstrııasyn damytý, sharıǵatqa saı ónim óndiretin kásiporyndar sanyn arttyrý, birlesken oqý-semınar dárister júrgizý máseleleri qozǵaldy.
«Halal – halyqqa, ultqa emes, Islam dinne tán ortaq uǵym. Baýyrlas ózbek halqynyń adal, taza, sharıǵatqa saı ónim tutynýy, otandyq naryqta halal ónimderdiń kóbeıýi bizdi qýantady. Ózbekstanda «QMDB halal» standarty boıynsha jumys jasaıtyn birneshe kásiporyn bar. Bul – eki el arasyndaǵy baýyrlastyqty arttyryp qana qoımaı, kórshilis qazaq halqyna degen senimniń kórinisi dep bilemiz» dedi Aıbek Asqarbekuly.
Óz kezeginde Saıdov Sýnnatılla myrza QMDB-nyń «Halal Damý» seriktestigi bekitken standarttardyń Ózbekstanda joǵary baǵalanatynyn atap ótip, eki eldiń halal salasyndaǵy baılanysy odan saıyn nyǵaıa túsetinin jetkizdi.
Aıta keteıik, «Halal Damý» JShS-niń alǵa qoıǵan maqsatynyń biri – «QMDB halal» tańbasymen shyǵarylatyn ónimderdi elimizde ǵana emes, kórshiles memleketterde de damytyp, otandyq halal tańbasynyń qundylyǵy men suranysyn arttyrý.
