Jasyl aımaqtaǵy meshitterde juma namazyn óteý tártibi
Ótken aptada Vedomstvoaralyq komıssııa (VAK) sheshimimen 1 naýryzdan bastap jasyl aımaqta turǵan óńirlerde juma namazyn ótkizýge ruqsat etilgen bolatyn.
Osy sheshimge sáıkes erteń elimizdegi jasyl aımaqtaǵy birqatar meshitterde juma namazy oqylady. Alaıda COVID-19 juqpaly derti áli seıilgen joq. Osyǵan oraı Qazaqstan musylmandary dinı basqarmasy jasyl aımaqtaǵy meshitterde juma namazyn oqýdyń arnaıy tártibin belgiledi.
Juma namazyn óteý úshin meshitke kelýshilerge qoıylatyn talaptar:
• Meshitke mindetti túrde betperde taǵyp kirý;
• Meshit kireberisinde arnaıy antıseptık zattardy paıdalaný;
• Dáretti barynsha úıden alyp kelý;
• Meshit ishinde belgili araqashyqty saqtaý, bir-birimen qol alyspaý;
• Namaz oqyǵanda araqashyqtyq 1,5 metrden jaqyn bolmaý, namazdy arnaıy belgilengen orynda oqý;
• Meshit ishinde uzaq ýaqyt qalmaý;
• Dene qyzýy 37°-tan joǵary, sondaı-aq tumaý jáne basqa da aýrý belgileri bar adamdardyń meshitke kelmegeni abzal;
• Jasy 65-ten asqan qarııalardyń, balalar men áıelderdiń meshitke kelmegeni durys.
Juma namazy oqylatyn meshitterge qoıylatyn talaptar:
• Meshitke kelýshilerdi dene qyzýyn arnaıy qurylǵymen tekserip kirgizý;
• Meshit kireberisi men ishine tazalaǵysh antıseptıkter, maskalar qoıý;
• Meshit ishin 1,5 metr araqashyqtyqty saqtaı otyryp arnaıy syzyp qoıý;
• Meshit syıymdylyǵyn 30%-dan asyrmaý;
• Paryz namazdarynda qysqa súreler nemese qysqa aıat oqý;
• Meshitke kelgen jamaǵattyń uzaq ýaqyt meshitte bolmaýyn eskertý;
• Meshitte qol alyspaý;
• Namaz oqý zaldaryna jıi zalalsyzdandyrý jumystaryn júrgizý;
• Meshit qyzmetkerleriniń betperde taǵýy mindetti;
• Múmkindiginshe (ońtústik aımaqtar) juma namazyn meshit aýlasynda oqý;
• Jamaǵattyń meshit aýlasynda namaz oqýyna jaǵdaı jasaý;
• Meshitke kelýshilerge qoıylatyn talaptardy meshit kireberisine ilip qoıý.
Aıta keteıik, 4 naýryzdaǵy Epıdemıologııalyq ahýal boıynsha Qazaqstannyń tórt óńiri sary aımaqta tur. Olar – Nur-Sultan, Almaty qalalary jáne Batys Qazaqstan, Qostanaı, Pavlodar oblystary. Al qalǵan óńirler jasyl aımaqqa kirdi.
Taǵy da eske salsaq, joǵaryda kórsetilgen sary aımaqtarda turǵan oblystar men qalalarda ázirge juma namazy oqylmaıdy.