Jumys tobynyń ekinshi kúni: 1157 adamdy qamtyǵan 23 is-shara ótti (FOTO)
Bas múftı Naýryzbaı qajy Taǵanuly bastaǵan jumys toby Atyraý oblysyna jasaǵan sapardyń ekinshi kúninde 1157 adamdy qamtyǵan 23 is-shara ótkizdi.
QMDB Tóraǵasy «Quran jattaý jáne dinı saýat ashý» ortalyǵynyń saltanatty ashylý rásimine qatysty. Munda shákirtter 3 jyl ilim alyp, medrese men ýnıversıtetke túsýge daıyndalmaq. Odan ári Bas múftı Atyraý qalasynda salynyp jatqan jańa meshittiń qurylysymen tanysty. Qazirgi tańda Atyraýda 35 meshit bar. Aldaǵy jyldary oblysta taǵy 25 meshit ashylmaq. Sondaı-aq Bas múftı Atyraýda Qazaqstan temirjoly kompanııasynyń qyzmetkerlerimen kezdesý ótkizdi. Kezdesýde Ihsan ilimi týraly túsinik berildi.
Ustaz Sansyzbaı Shoqanov ortalyq «Imanǵalı» meshitinde «Halal azyqtyń mańyzy» týraly dáris oqydy. Odan ári «Máýlimbergen» meshitinde jamaǵatpen kezdesip, «Allanyń qudireti jáne Islamdaǵy aýyzbirshilik» taqyrybynda ýaǵyz aıtty. Belgili ustaz Batyrjan Mansurov atyraýlyq ımamdarǵa dáris oqydy. «Ýaǵyz aıtý ádisi» taqyrybynda dáris bergen ustaz Batyrjan Mansurov ımamdar tarapynan qoıylǵan saýaldarǵa jaýap berdi.
Ustaz Qanat Alshynbaev H.Dosmuhamedov atyndaǵy Atyraý memlekettik ýnıversıtetiniń stýdentterimen kezdesti. Onda «Radıkaldy pikirden alshaq bolý» taqyrybynda ýaǵyz aıtyp, jastar tarapynan qoıylǵan saýaldarǵa jaýap berdi. Qazaqstan musylmandary dinı basqarmasy janynan qurylǵan jumys toby músheleri sapardyń ekinshi kúninde barlyǵy 23 is-shara ótkizdi.
